O alumnado da FP dual en Xestión da Auga posto en marcha este curso no CIFP Universidade Laboral en colaboración con Emalcsa están completando a súa formación con seminarios a cargo de empresas colaboradoras. A última celebrouse a semana pasada da man de ABN Distribución na que os estudantes puideron ampliar a súa formación teórica.

Ao seminario, ademais do alumnado e do titor do ciclo, asistiron técnicos de Emalcsa e dos concellos da área metropolitana, así como persoal da compañía. A xornada celebrouse na sede de ABN, no parque empresarial de Agrela. Deste xeito, a sesión rematou cunha visita ás instalacións para así coñecer de primeira man a organización e loxística desta empresa.

Durante este seminario contouse tamén coa colaboración de Belgicast-Talis, Electrosteel e Cofunco. Xunto a eles deseñouse un programa destinado ao coñecemento sobre os sistemas de condución e os seus elementos de control, de válvula, tubaxes en fundición dúctil e novas solucións para tapas de arquetas en vías publicas.

Esta formación completarase con outra xornada no mes de marzo sobre novas solucións en materiais plásticos para redes de distribución e saneamento, así como afondar nos mecanismos e elementos hidráulicos de control das redes.

A primeira destas sesións celebrouse na propia Universidade Laboral da man da empresa VonRoll-hydro, que ofreceu un seminario sobre a importancia da auga non medida e as tecnoloxías de localización de fugas en redes a presión.